Ötən il həm COP29-un, həm də birinci Bakı İqlim Fəaliyyəti Həftəsinin uğurla başa çatmasından sonra Azərbaycan bu il Xəzər dənizi sahilində iqlim dəyişmələri üzrə liderlərin beynəlxalq miqyaslı toplantısına bir daha ev sahibliyi edəcək.

Belə ki, Bakı İqlim Fəaliyyəti Həftəsi-2025 çərçivəsində əldə olunan mühüm dinamikanı davam etdirmək üçün biz sentyabrın 29-dan oktyabrın 3-nə kimi şirkət və sənaye liderlərini, eləcə də beynəlxalq qurumlar, elmi dairələr və vətəndaş cəmiyyətinin nümayəndələrini, habelə mütəxəssis və gənclərlə yanaşı, digər iştirakçıları Bakıda qəbul edəcəyik.

Azərbaycan Respublikasının paytaxtı Bakı şəhəri müasir və zərif üsluba malik memarlığı, yaşıl parkları, dənizkənarı bulvarı və BMT-nin Təhsil, Elm və Mədəniyyət Təşkilatının (UNESCO) Ümumdünya İrsi Siyahısına daxil edilmiş tarixi abidələri ilə məşhurdur. Bu il keçiriləcək Bakı İqlim Fəaliyyəti Həftəsi-2025 sayəsində isə şəhərimiz öz mövqeyini iqlim həlləri təqdim edən peşəkarların regionda əsas toplantı məkanı kimi də möhkəmləndirəcəkdir.

Həmçinin, biz birlikdə Braziliyanın COP30 Sədrliyinin “Global Mutirão” təşəbbüsünə, eləcə də Bakıda COP29 zamanı əldə olunmuş dinamik fəaliyyətin 2025-ci ilin noyabrında Braziliyanın Belem şəhərində keçiriləcək COP30 tədbirində də təşəkkül tapmasına kollektiv töhfə verəcəyik.

Sizi də bu qlobal səylərə qoşulmağa və bizimlə birgə addımlamağa çağırırıq!