COP29-un və Bakı İqlim Fəaliyyəti Həftəsinin uğurlu təşkilinin nəticələrinə əsaslanaraq, Azərbaycan qlobal iqlim ictimaiyyətini bir daha Xəzər dənizinin sahillərində qəbul etməkdən qürur duyur.

7–11 sentyabr 2026-cı il tarixlərində keçiriləcək Bakı İqlim Fəaliyyəti Həftəsi (BİFH) 2026 hökumət, biznes və maliyyə sektorlarının, beynəlxalq təşkilatların, akademik dairələrin, vətəndaş cəmiyyətinin, gənclərin və yerli icmaların nümayəndələrini bir araya gətirəcək.

BMT-nin İqlim Dəyişikliyi üzrə Çərçivə Konvensiyasının (UNFCCC) Bakı Regional İqlim Həftəsi ilə eyni vaxtda keçiriləcək tədbirlər proqramı iqlimlə bağlı öhdəliklərin real icraya çevrilməsinə, tərəfdaşlıqların gücləndirilməsinə və dayanıqlı, aşağı karbonlu gələcəyi dəstəkləyən praktiki həllərin təşviqinə yönələcək.

Bakı artıq iqlim məsələləri üzrə dialoq və əməkdaşlıq üçün regional mərkəzə çevrilib və qlobal ambisiyalarla yerli və regional fəaliyyəti bir-birinə bağlayır. COP29-un irsini və COP30-un yaratdığı dinamikanı davam etdirən BİFH2026, əməkdaşlığı gücləndirməklə, investisiyaları səfərbər etməklə və iqlim fəaliyyətini sürətləndirməklə COP31-ə gedən yolun formalaşmasına töhfə verəcək. Bu proses Azərbaycan, daha geniş region və bütövlükdə dünya üzrə iqlim fəaliyyətinin sürətləndirilməsinə xidmət edəcək.

İqlimlə bağlı ambisiyaları real fəaliyyətə çevirmək, insanlar, icmalar və planet üçün uzunmüddətli nəticələr yaratmaq məqsədilə birlikdə çalışarkən sizi Bakıda qarşılamağı səbirsizliklə gözləyirik.